ក្រោយក្រសួងចេញវិធានការ៦ចំណុចពាក់ព័ន្ធនឹងបទចម្រៀង “ជីវិតអ្នកប្រដាល់” របស់តារាចម្រៀងខេម ដែលធ្វើឲ្យប៉ះពាល់អារម្មណ៍បងប្អូនកីឡាករប្រដាល់ និងទស្សនិកជនមួយចំនួននោះ លោក អ៊ា វឌ្ឍនា អ្នកចាត់ការទូទៅក្នុងផលិតកម្មថោនប្រាប់ថារឿងនេះ វាបានកន្លងផុតទៅ ជាង២ខែហើយ ភាគីទាំងសង្ខាងក៏បានជួបពិភាក្សាដោះស្រាយគ្នារួចអស់ហើយ។
អ្នកចាត់ការទូទៅក្នុងផលិតកម្មថោនខាងលើថ្លែង៖ “ការពិតរឿងរ៉ាវនេះបានបញ្ចប់ទៅយូរណាស់ដែរហើយ ក្នុងនោះខាងពួកខ្ញុំក៏បានជួបពិភាក្សា និងធ្វើសេចក្តីព្រមព្រៀងរាល់កំហុសដែលបានកើតឡើងដោយអចេតនា ជាមួយខាងក្រសួងរួចរាល់អស់ហើយដែរ។ ប៉ុន្តែមិនដឹងថាបណ្ដាផេគមួយចំនួន ហេតុអ្វីបានសើរើយកមកផុសវិញយ៉ាងដូច្នេះ”។
ចំណុចមួយចំនួន ដែលផេគមួយបានផុសពាក់ព័ន្ធនឹងបទ ជីវិតអ្នកប្រដាល់ ក្នុងបណ្តាញសង្គម
យ៉ាងណាមិញលោក អ៊ា វឌ្ឍនា បញ្ជាក់ទៀតថាបទ “ជីវិតអ្នកប្រដាល់” ដែលពីដំបូងឡើយបានធ្វើឲ្យប៉ះពាល់អារម្មណ៍របស់បងប្អូនកីឡាករប្រដាល់់ក៏ដូចជាទស្សនិកជនមួយចំនួននោះ ពេលនេះបានកែទំនុកច្រៀងសាជាថ្មី មិនមានពាក្យពេចន៍ដូចអ្វីដែលក្រសួង និងខាងសហព័ន្ធភាពកីឡាបានលើកឡើងត្រង់ពាក្យថា “តិរច្ឆាន” ដូចកាលពីមុនឡើយ ទៀតសោតបទនេះមិនមានយកទៅធ្វើអាជីវកម្មផលិតជា MV នោះទេ។
ជាក់ស្តែងនៅក្នុងកម្មវិធី “ស៊ីអារម្មណ៍” របស់ស្ថានីយ៍ទូរទស្សន៍ PNN បានអញ្ជើញតារាចម្រៀង ខេម ឡើងច្រៀងកាលពីប្រមាណមួយខែមុន ឃើញថារាល់ពាក្យពេជន៍ក្នុងបទចម្រៀងគឺបានផ្លាស់ប្តូរ ជាពិសេសត្រង់ឃ្លា “ថ្ងៃខ្លះខ្លួនខ្សោយទប់ទល់លែងបាន ដូចសត្វតិរច្ឆាន ត្រូវគេវាយដំ ” ជំនួសដោយឃ្លា “ថ្លៃខ្លះខ្លួនខ្សោយទប់ទល់លែងបាន ឈឺហួសប្រមាណ ត្រូវគេវាយដំ” វិញ។
ខេម ច្រៀងបទ “ជីវិតអ្នកប្រដាល់” ក្នុងកម្មវិធី “ស៊ីអារម្មណ៍” របស់ទូរទស្សន៍ PNN
ជួបជាមួយលោក ស៊ិន ចន្ទសាយ៉ា ប្រធាននាយកដ្ឋានភាពយន្ត បានមានប្រសាសន៍ពាក់ព័ន្ធនឹងបញ្ហាខាងលើដូចនឹងលោក អ៊ា វឌ្ឍនា បានបញ្ជាក់ដែរថាវាបានកន្លងផុតទៅយូរហើយ។ ក្នុងនោះភាគីខាងផលិតកម្ម និងរូបលោកផ្ទាល់ក៏បានជួបពិភាក្សាគ្នាពីបទ “ជីវិតអ្នកប្រដាល់” នេះរួចរាល់ដែរ។
រាល់បទចម្រៀងដែលខាងផលិតកម្មនានាបានចេញលក់នៅលើទីផ្សារ ខាងក្រសួងមិនបានពិនិត្យមុនឡើយ ប៉ុន្តែបើករណីរាល់បទចម្រៀងដែលចេញមក ធ្វើឲ្យប្រាសចាកពីក្រមសីលធម៌ ឬ ប្រពៃណីជាតិខ្មែរ នោះ លោក ស៊ិន ចន្ទសាយ៉ា ថាខាងក្រសួងវប្បធម៌និងវិចិត្រសិល្បៈនឹងមានវិធានការនានា ដោយផ្អែកទៅ លើខ្លឹមសារនៃបទទាំងនោះ។
ស៊ិន ចន្ទសាយ៉ា ប្រធាននាយកដ្ឋានភាពយន្ត
ប្រធាននាយកដ្ឋានរូបនេះបញ្ជាក់ទៀតថា៖ “ខ្ញុំមិនដឹងថាផេគណា យកពត៌មាននៃបទនេះមកសើរើឡើងវិញនោះទេ ព្រោះវាបានកន្លងផុតទៅ យូរដែរហើយ។ យើងក៏បានដោះស្រាយគ្នារួចអស់ហើយដែរ។ វិធានការព្រមានទាំង៦ចំណុច ទាំងសង្ខាងគឺបានព្រមព្រៀងគ្នារួចអស់ហើយ។ បើចេះតែមានផុសបន្តបន្ទាប់ដូច្នេះ ពេលណាបទនេះនឹងកប់បាត់”។
ពាក់ព័ន្ធនឹងបញ្ហាដែលបានកើតឡើងលោក ស៊ិន ចន្ទសាយ៉ា សំណូមពរក៏ដូចជាស្នើសុំគ្រប់បណ្តាផេគក្នុងបណ្ដាញសង្គម និងសិល្បករនានា សូមឈប់បន្តយកបទ “ជីវិតអ្នកប្រដាល់”នេះមកច្រៀង និងចាក់ផ្សាយក្នុងទូរទស្សន៍ទៀត។ ជាមួយគ្នានេះដែរលោកក៏បានធ្វើសេចក្តីហាមប្រាមទៅដល់ខាងផលិតកម្មរួចហើយ ថាឲ្យដកបទនេះចេញពីក្នុងប្រព័ន្ធយូធូបផ្លូវការថោន៕
